الأدباتية الثقافية

جريدة تهتم بالثقافة المحلية والعالمية وإنتاج الأدباء ونشر أعمالهم تقديرا لموهبتهتم ونشر آراء المفكرين وتوجيه القائمين علي الثقافة
 
الرئيسيةالرئيسية  البوابةالبوابة  اليوميةاليومية  مكتبة الصورمكتبة الصور  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  
تهنئ الادباتية الثقافية اسرة التحرير علي تصميم الموقع الالكترونى الجديد للادباتية http://www.aladbatiaelthkafia.comللاستفسار 01202503721او soliman.kotb@yahoo.com
ادارة المنتدى تشكر الاستاذ خالد ابو المجد علي استمراره خمسة سنوات بمنتدى الادباتية وتهنئه بالعام السادس للادباتية مع تحياتى سليمان قطب ...................................................................................................................................................................................................................................................... للتواصل عبر الهاتف 01202503721

شاطر | 
 

 اخنا اسفين يابابا حسنى

اذهب الى الأسفل 
كاتب الموضوعرسالة
عبير قنديل



عدد المساهمات : 9
تاريخ التسجيل : 20/08/2009
العمر : 28

مُساهمةموضوع: اخنا اسفين يابابا حسنى   الأربعاء فبراير 09, 2011 6:41 am



لن يضيع دم الشهداء هباء
لن نترككى يا مصر فى يدى فرعون طاغى
كلام الحكومة وخطاب مبارك موجهيين لفئات معينة
ده الى ربات البيوت افهموا بقى اللى بيقولوا حسنى ماينفعش يتنازل عشان :
1:-
بابا حسني مبارك:
أنا عندي هنا في أرض الجمعية في إمبابة نائب حزب وطني من ساعة ما وعيت ع الدنيا وهو بيكسب في انتخابات مجلس الشعب, يعني على الأقل من حوالي 27 ساعة, هل المفروض لما أرض الجمعية يثوروا عليه و يطلبوا خروجه فورا من البرلمان أقول لهم و أنا متأثّر خلاص يا جماعة,بس عيب..فين الأخلاق...بابا النائب يا جماعة..الناس الكويسين ميعملوش كده..ده طلع في الخطاب عمل عيشة و قال أنا آسف...يالا نسامحه يا جماعة!, ده خطاب تاريخي والله...يالا نعيط زي منى الشاذلي, لكل أصحاب نظرية احترام الكبير وده زي أبوكوا بقى الحاج ابو علاء تعملوا فيه كده, السياسة و مصاير البلاد مفيهاش بابا و عمو, حرام عليكم, دلوقتي بقى زي أبونا بعد ما كان ظالمنا و ذاللنا و مسيب علينا كلابه ينهبوا البلد وينهشوا ف لحمنا . اللى تعاطف مع حسنى عشان كلمتين قالهم مالهمش لازمة طب ودم الشباب اللى مات اللى عربيات الداخلية دهستهم ورصاصهم نفذ لرؤسهم وقلوبهم تخيل ابنك مكانه مش ودمه سايل وغيرك بيقول كده.

2:-
تسليم و تسلم السلطة بياخد ملايين السنين :
مبدئياً هو فيه حد لسه فاكر إن مبارك فعلاً واعي و مركّز و بيتابع كل شئون الدولة؟, يعني إيه الفرق لما مبارك يتنحى و عمر سليمان يعمل نفس اللي بيعمله مبارك دلوقتي, اللي هو بالمناسبة لاشيء, وأمنياً, وجود حسني من عدمه مش فارق, عمر سليمان هو اللي جاب وزير الداخلية الحالي, مش شغال فري لانس مع مبارك, و يقولك: هو إزاي يعني يمشي فوراً, هو بيسلّم كشك, طيب عشان هو فعلا مش بيسلم كشك ومش هنقعد نحسب معاه الإيراد و لا حيسلم عمر سليمان دفاتر المخزن و المرتجع, لازم مبارك يتنحى فوراً, تسليم و تسلم الدولة مش إن مبارك يقعد مع عمر سليمان يفتح معاه دفتر وزارة وزارة و شوف ياعم و خد عندك و إحسب معايا و إديني الإيراد و خلي بالك من دول و اعتقل دول!, هو كان يعني حسني مبارك كل يوم بيشوف أحوال البلد و متابع أمها و عارف كل حاجة فيها!, دي دولة منهارة مش لسا هتنهار يابتوع السياسة يا اللى بتححللوا. دىمحتاجة تدخل الانعاش, مش نقعد نسلّم في امها شهور, لازم يتنحى فورا, والمسئولين في كل مكان في مصر حيسلموا الامور لعمر سليمان, متخافوش, وزير الري مش حياخد النيل و يرفض يسلمه لعمر سليمان, ولا مبارك حيروح شايله و هربان بيه ده لو عرف ينفد بجلده يبقى خير وبقرة.

3:-
ارحموا عزيز قوم ذل:
كان رحمك هو لما كنت بتتهان من أقل رتبة في الداخلية, كان رحم أختك من البهدلة في المواصلات و التحرش, كان رحم أبوك من سرقة رزقه لحساب أحمد عز و ابنه و مراته و أصدقائه, ليه بس حبيب العادلي هو اللي يتحاكم, مين اللي جابه للوزارة؟, مين المسئول الأول عن فساد مصر, هو كمان لازم يكون عبرة لكل ظالم بعده, وإلا الرؤساء تيجي تمص دم أبونا و بعدين لما نزنقهم يطلع لنا بتوع الأخلاق الجديدة يقولوك: ياجماعة!..إرحمو- أحمد- عز قوم ذل...

4:-
ياجماعة ده كان بطل في أكتوبر:
إيه رأيك في زين العابدين بن علي؟ كلب؟ طاغية؟ ذلّ شعبه؟ طيب ما زين العابدين بن علي كان بطل من أبطال تحرير تونس هو و الطاغية اللي قبله الحبيب ؟ كونه "كان" بطل في أكتوبر, ميديلوش الحق يذل ف شعبه و يهينه للدرجة اللي وصلتها مصر قبل 25 يناير, تدهور علمي و صحي و أخلاقي و سياسي و ثقافي و أمني!, كونه "كان" بطل مايعفيهوش من إنه تحول لطاغية و ظالم و مسئول أول عن الفساد و الظلم في مصر, مصر مليانة أبطال غيره أصلح, وأنا متأكد إنك لو فتشت في تاريخ العادلي حتلاقيه هو كمان كان بطل في كذا مناسبة أو حادث, لكن مفيش حد بياخد ضمان ثقة مدى الحياة و مهما عمل عشان في يوم من الأيام "كان" بطل.

5:-
تلاتين سنة أمان:
آه صح, أمان بالمناسبة إتجوزت و جابت خديجة ويوسف, أمان لما كان أصغر أمين شرطة يقدر يهين أكبر أستاذ في الجامعة في أي لجنة أو كمين, أمان لما كان أصغر ظابط شرطة أو أمن دولة وأحيانا جيش ليه الحق قبلك في ركنة العربية و حجز الشقة, ممكن يحول حياتك لجحيم لو طلب إيد أختك و رفضته, أو حصل بينك و بينه خلاف في العمارة, أمان لما كان البوليس ييجي الخناقات بعد فضّها, أمان لما كان كل مصري ممكن ينزل من بيته و ميرجعش عشان ظابط شرطة اشتبه فيه أو قرر يعتقله بموجب قانون الطواريء.
6:-
دول كام يوم و حيمشي خلاص نستحملهم :
يعني العالم كله شايف على التلفزيونات الناس في البلد اللي إنت بتحكمها متظاهرين, طلعت عليهم بلطجية بسيوف و مولوتوف!, ماشي: هو غبى . ساذج وكمان بريالة يا سيدى و اللي حواليه بيلبسوه مش العمة ولاالطاسة دا المطبخ كله و يعملوا اللي عايزينه, ايه رايك . مرضى هو ده بقى النموذج اللي يقدر يحكم مصر في فترة حرجة زي دي؟ مغفل حواليه كلاب و زبالة؟, وإذا كان مش عارف يحمي شعبه دلوقتي, في الوقت اللي فيه الناس متكاتفة ازاى هيقدر فعلا خلال الـ 200 يوم اللي فاضلين لما الناس تنزل شغلها و تنسى شوية حكاية اللجان الشعبية, حيحصل فينا إيه؟ حيعمل إيه في معارضيه؟ إذا كان مش قادر يحمي الناس اللي العالم كلها باصة عليها إنهم معارضيه!

7:-اللي في ميدان التحرير لسه قاعدين هناك ليه:
كل يوم بسبب الناس اللي في ميدان التحرير النظام الفاسد بيقدم تنازلات و يحاول يسحب ناعم و يعتذر و يقولك حنحاكم و يصادروا أموال و يعتقلوا كلاب .انتو عايزينه يموتلكو نفسه يعنى عشان تستريحوا. كل ده بسبب الضغط عليهم شعبيا و دوليا لعدم تنفيذ مطالب اللي في ميدان التحرير, الناس اللي بتقعد تشتمهم و تخوّنهم, و بعدين الصبح لما تعرف إن عمر سليمان عمل و سوّى و صادر و اعتقل و قال تفتخر أوي بنفسك و تقول والله إحنا شعب ياكل الزلط, يا اخي اختشي على دمك, يا ترحمهم من جهلك و سذاجتك و غسيل التلفزيون المصري لمخك, يا تنزل معاهم تحقق مطالبك.

8:-
حالنا واقف و مفيش شغل:
والله دي تسأل فيها حكومتك الرشيدة اللي عايزها تقعد معاك برئيسها 200 يوم كمان, ما تروح شغلك؟, مش كل مصر بتشتغل في ميدان التحرير , و المجمع قدامه فاضي و المتظاهرين سمعوا كلام الجيش و قاعدين خارج كامل ساحته عشان ميعطلوش أي حاجة, روح شغلك و اشتغل و متشتغلش بالك باللي في ميدان التحرير, هما من غيرك بيعملوا كتير, وجودك فعلا حيفرق معاهم بعد ما تخلص شغلك و تحب تشاركهم , بس إنت بتتحجج بيهم عشان تقعد في البيت تتفرج على التلفزيون.

9 :-
حروح الشغل إزاي و مفيش أمان في الشوارع بسبب الناس اللي في ميدان التحرير:
طيب وهي الحكومة ليه مستنية الناس اللي في الميدان تروّح عشان تنشر الشرطة و الأمن في الشوارع؟ هل مثلا عشان هي عندها شوية صغيرة باقية من كلاب الشرطة و كلاب المباحث و مفيش غيرهم يأمنوا الشوارع عشان هما مشغولين اليومين دول بالهجوم على المتظاهرين في الميدان و تنظيم هجمات البلطجية ياجماعة؟ صحيح هما حيعملوا إيه ولا إيه, الكل عارف إن وزارة الداخلية دلوقتي قوتها الحقيقية 40 % تقريباً, و الباقيين رافضين الرجوع للعمل في الوزارة لأسباب متنوعة, الحكومة ليه مصرة تحشد الـ 40 % حوالين ميدان التحرير؟!

10 :-
اللي في ميدان التحرير دول قابضين و خونة و مخربين و حرامية و موساد و عملاء للأمريكان و معارضة ومؤيدين للبرادعى ومتسلطين من الموساد وإخوان و شيعة و باكستانيين و أفغان و كائنات فضائية:
طيب إنت رحت شفتهم؟ ولا القنوات المصرية والحج انس الفقى دلوقتي اصبحوا مصدر موثوق فيه؟ اللي هناك دول هما أشجع و أنضف و أشرف ناس في مصر, و بالمناسبة للي بيقول عليهم شوية شباب متحمسين عايزين مبارك يمشي فوراً, هما كمان أذكى ناس في مصر سياسياً, عشان فاهمين النظام الفاسد ده كويس, لا بيقولوا عليه بابا ولا يا جماعة ده كان بطل ولا تسليم و تسلم الكشك بياخد وقت, وفاهمين كويس إيه اللي بيضغط على نظام فاسد زي ده, و إيه معنى التوقّف عن الضغط على نظام جبان و مليان كلاب زي ما العالم كله شاف.

11:-
الإخوان هما اللي في ميدان التحرير:
فيه إخوان مسلمين هناك فعلاً, وكل يوم الإخوان المسلمين بيثبتوا إنهم فعلا مصريين بجد, و أثبتوا فعلا إنهم جديرين بثقة الناس, وده بشهادة ناس كتير و مثقفين سياسيين واعيين جدا, هما كتير فعلا هناك, بس اللى هناك كلهم همهم هو مصر القاهرة ياجماعة فاكرينها القاهرة لكل فساد وظلم ظاغية, ولا حرموا أي حد هناك من إنه مثلا يقعد مع صديقة ليه أو يتكلم معاها , بالعكس, سابوا الميكروفون لحازم شاهين يغني و بيذيعوا أغاني وطنية و بيسمحوا لمداخلات من كل الأطياف الموجودة في الميدان, كونهم منظمين و فاهمين سياسة ده مش عيب, ولو خايف منهم فده لإنك جاهل سياسياً, دي مش شهادة للإخوان, دي رد حق ليهم عشان الكلام الفارغ اللي بسمعه كل يوم من الناس .


12 :-
خلينا نهدى شوية بس و نجرب الحكومة الحالية يمكن فعلا ينفذوا اللي قالوه:
نجربهم!..30 سنة ذل و نجربهم؟, بطلجية على المتظاهرين و نجربهم؟ هما لامؤاخذة احترموا نفسهم ليه, عشان ضغطنا عليهم, هل لو الدنيا هديت فعلا حينفذوا اللي قالوه؟, النظام الفاسد ده تجريبه معناه إنك تاخد على قفاك10مرات و تقول معلش قالولي مش حيضربوني على قفايا تاني.

13:-
الناس جعانة و مش معاها فلوس و حيموتوا بعض:
الناس لازم تعرف إن الحرية أغلي من العيش, وإن معلش نستحمل شوية مقابل حريتنا, و لوحد جاع حيلاقي كتير يأكلوه, ولو ضاقت بيه الدنيا ممكن يروح ميدان التحرير و حيلاقي هناك أكل و شرب و كل حاجة, الناس مش معاها فلوس عشان البنوك مقفولة عشان مفيش تأمين ليها, عشان الداخلية مش فاضية للأمن وفاضية للبلطجة على الشعب.


14:-
يا جماعة لازم يمشوا عشان المادة 82 و 84:
وهما بالمناسبة كالتالي:
المادة 82
إذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذر نيابته عنه. ولا يجوز لمن ينوب.عن رئيس الجمهورية طلب تعديل الدستور أو حل مجلس الشعب أو مجلس الشورى أو إقالة الوزارة.

و المادة 84
فـى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، وإذا كان المجلس منحلا حل محله رئيس المحكمة الدستورية العليا، وذلك بشـرط ألا يرشـح أيهما للرئاسة، مع التقيد بالحظر المنصوص عليه فـى الفقـرة الثانية من المادة 82. ويعلن مجلس الشعب خلو منصب رئيس الجمهورية. ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسة.
و الخلاصة من الوهم أعلاه هي إن مبارك لازم يمشى
أصل إحنا لما مبارك يتنحى و ييجي واحد بعده ومايغيرش مواد الدستور الباطلة لا هو ولا الوزارة حنقول: لازم نحترم الدستور الفاسد المرسّخ للاستبداد السياسي عشان ده الدستور و الحكومة كمان..مينفعش يا جماعة...فين الأخلاق, بالظبط زي بابا مبارك كده ما هو فاسد و مقصّر بس احترام الكبير يا جماعة عيب مينفعش.
طبعاً طبعاً لما مبارك يغور بكل بساطة ممكن الحكومة الانتقالية المؤقتة تقعد أقل من الـ 200 يوم بتوعه دول بنص المادة 84 و يتم اختيار رئيس "مؤقت" لتحقيق مطالب الشعب و حيكون مفروض عليه تغيير الدستور سواء رفض أو قبل وإلا الناس اللي نزلت لمبارك حتنفخه هو كمان, لحين عقد انتخابات رئاسية يختار فيها الشعب المصري رئيسه, بعدين أكيد كل القضاة الموجودين بالإضافة لكل المثقفين السياسيين الموجودين مش فاهمين هذا المأزق الدستوري العظيم اللي اكشتفه عمر سليمان و أحمد شفيق و بصوا لبعض و شهقوا و قالوا: يا خرابي, ده مبارك طلع مهم !

15 :-
يا جماعة طيب نسيبه حقنا للدماء, إحنا تعبنا كفاية
محدش قال إن الحرية مش غالية و مش مقابل دماء كمان, فيه ناس تعبت نفسيا و ماديا و عصبيا, و بيقولوا كله بسبب المظاهرات اللي من طرف واحد فما بالك بمظاهرات من الطرفين, المظاهرات اللي تعبتكوا دي هي اللي جابتلكم كل المكاسب اللي اتحققت, واللي كان فيه قطاع كبير من الناس اللي تعبانة دلوقتي دي ضدها في البداية و بيهاجموها بكل شراسة و خوف و جبن أحياناً, إنتوا تعبتوا نفسيا من 10 أيام, و الناس في التحرير بتموت و بتتهاجم و بتصاب و بترجع تاني تدافع عن نفسها و عن حقها في تنفيذ مطالبها, فيه ناس لو روحت بيوتها أكيد تاني يوم حيتم ملاحقتها و اعتقالها, لو تعبت إفتكر إنك أصلا كنت تعبان, إتعب شوية كمان عشان تعيش عيشة محترمة.واياك حد يقول احنا اسفين يا بابا .




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اخنا اسفين يابابا حسنى
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الأدباتية الثقافية :: المادة الاعلامية :: الاقسام الادبية :: اقلام حرة-
انتقل الى: